قـــشر الشعر

17/5/2009

قشر الشعر بيسمى علميا باسم (التهاب الجلد الزهمي) وهو عبارة عن قشور بيضاء أو صفراء من الجلد الميت

وإصابتها بتسبب حدوث هرش مستمر في فروة الرأس.

وأحيانا بيكتر هذا القشر لدرجة إنه يمتد إلى الحواجب والرموش والأذنين والأنف والرقبة

وممكن إنه يسبب احمراراً بالجلد في هذه الأماكن.

كمان لازم تعرفي حاجة مهمة قوي وهي إن فروة الرأس دي زيها زي باقي جلد الجسم بتتخلص دائماً من الخلايا

الميتة وتستبدلها بغيرها من الخلايا الجديدة

وفي العملية دي بيبقى الجلد محتفظ بمظهره العادي

ولكن لما العملية دي تزيد شوية بطريقة شاذة يظهر قشر الشعر.

((أنواع قشر الشعر))

فيه نوعين لقشر الشعر:

النوع الأول**: وبيسمى القشرة الجافة وبيكون على شكل قشيرات بيضاء متناثرة على جلد الرأس.

النوع الثاني**: وبيسمى القشرة الدهنية وهو ناتج عن زيادة إفرازات المواد الدهنية في فروة الرأس

والنوع ده بيكون محتاج للعلاج لأن القشور صعب قوي إزالتها.

ودلوقتي لازم تعرفي ليه بيظهر القشر ده.

اسباب الاصابه بالقشره

بتختلف أسباب الإصابة بقشر الشعر من شخص إلى الآخر بس

على العموم ممكن نقول إن السبب قد يرجع إلى أحد أو مجموعة العوامل الإتية:

1- الإسراف في تسريح الشعر زيادة عن اللزوم خاصة إذا كان التسريح ده بيتم بعنف

لأن بكده بتقشرى فروة الرأس بشدة وبالتالي بتساعديها على إنها تفرز القشور.

2- زيادة إفراز الدهون بفروة الرأس اللي بيكون بسبب نشاط الغدد الدهنية الموجود بها

وهذه الزيادة قد يكون سببها نفسي نتيجة التعرض لضغط عصبي.

3- الإفراط في استخدام السشوار على الفاضي والمليان وده لأن كتر استخدام السشوار قد يكون سببا في

جعل الشعر وفروة الرأس ضعيفة قوي وبالتالي الإصابة بقشر الشعر.

4 – الإفراط في استخدام كريمات الشعر والجيل لأن المواد دي كلها بتلتصق في الشعر

وبالتالي بتقوم بإزالة الطبقة العازلة الموجودة وبالتالي بيسهل الإصابة بقشر الشعر نتيجة عدم الرعاية والاهتمام.

5- التقلبات الجوية ممكن كمان إنها تؤدي إلى قشر الشعر علشان كده بتلاقي إن قشر الشعر بيكتر في فصل الشتاء

وده بسبب إن الشعر في الفترة دي بيتأثر بجفاف الجو وبيكون هو كمان جاف..

وبكده بتكون الفرصة مناسبة لقشر الشعر.

6- حدوث اضطرابات هرمونية في جسم الإنسان علشان كده ممكن تلاقي إن فيه بنات في وقت الدورة الشهرية

بيزيد عندهم قشر الشعر نتيجة حدوث اضطرابات هرمونية.

**نصائح للتخلص نهائيا من القشرة**

1- احرصي على تدليك فروة الرأس قبل النوم بكمية كافية من زيت الزيتون أو زيت اللوز أو زيت الصبار

وبعد كده لفي شعرك وفي الصباح اغسليه بالماء الدافئ.

حاولي إنك تكرري هذه العملية يوميا لغاية ما تلاقي إن القشرة بدأت تنتهي تماما.

2- ياريت إنك تتجنبي تماما الإيشاربات المصنوعة من مادة النايلون أو البوليستر لأن النوع ده من الأقشمة

ممكن يؤدي لظهور بعض أنواع من الحساسية في فروة الرأس أو تكوين طبقة سميكة من القشرة على فروة الرأس

أو قد تصيبك -لا قدر الله- بنحول الشعر خاصة لو كان شعرك بيتميز إنه خفيف من الأمام.

علشان كده لو محجبة ياريت إنك تلبسي الحجاب المصنوع من الأقمشة القطنية..

3- في بعض الصيدليات بيوجد غسول طبي بيحتوي على مادة الكبريت اللي ممكن إنك تتدلكي بيها الشعر

ثم يغسل بعدها بشامبو مخصوص للقشر، وهو متوافر بالصيدليات أيضا..

ويكرر استخدام هذا الغسول مرة كل أسبوع حتى تتخلصي من القشر نهائيا.

4- استخدمي نوع شامبو مناسب لنوع شعرك وضد القشرة بس خلّي بالك إنك تشطفي شعرك بالراحة

في كل مرة تغسليه فيها علشان لو شطفتيه بعنف ممكن إنك بكده تزودي في إفراز القشرة.

5- ياريت تتجنبي استخدام السشوار على الفاضي والمليان خاصة في الفترة اللي بيكون فيها شعرك جاف

وفيه قشرة كتير، لأن ده ممكن إنه يخلي فروة شعرك أضعف؛

علشان كده ولو لازم قوي إنك تستخدمي السشوار يبقى مرة في الشهر.

6- يا سلام بقى لو جربتِ إنك تشطفي شعرك بشوية خل بعد استخدام الشامبو وده لأن الخل بيساعد

على التخلص من قشرة الشعر.

7- ياريت لو كنتِ بتعاني من القشرة إنك تستخدمي مشط خشب ويكون خاص بيكِ لوحدك علشان ماينتشرش

قشر الشعر عند شخص آخر استعمل هذا المشط.

8- بعد تسريح الشعر ياريت إنك تغسلي المشط بماء جاري بس تكون المية سخنة.

دي شوية وصفات ممكن إنك تجربيها بجانب النصايح علشان تتخلصي من قشر الشعر بطريقة طبيعية

وعلى فكرة الوصفات دي مش بس بتساعد على التخلص من قشر الشعر

لأ دي كمان بترجع لشعرك حيويته ولمعانه اللي ممكن إنه يفقدهم بسبب قشر الشعر.

بس كل الحكاية عايزة منك شوية صبر وعناية متتابعة لفترة معينة..

يتبع

17/5/2009

((((خلاصة الصبار ))))

استخدمي خلاصة الصبار في تدليك فروة الرأس لمدة 15 دقيقة مرتين في الأسبوع، وبعد كده اغسلي شعرك.

وتكرار استخدام خلاصة الصبار هيقضي على القشرة ويمنع ظهورها تماما،

ده بالإضافة إلى إنه بيساعد على نمو الشعر.

(((خل التفاح )))

ما عليكِ غير إنك تحضري خل التفاح، ودفيه عن طريق إنك تضعي الزجاجة اللي فيها خل التفاح

في مية سخنة وبعد كده اشطفي بيه شعرك واتركيه لمدة ساعة وبعد كده اشطفي شعرك بالماء الدافئ.

كرري العملية دي مرة كل أسبوع وكمان ممكن إنك تستمري فيها حتى بعد اختفاء قشر الشعر

لأن خل التفاح بيعطي للشعر رائحة حلوة.

(((السفرجل)))

والسفرجل ده بقى فاكهة مشهورة مهمة قوي في القضاء على قشر الشعر.

تاخدي ملء معلقة صغيرة من مسحوق بذور ثمار السفرجل وحطيها في كوب مية باردة وغطيها

لمدة 24 ساعة، بعد كده خدي المية بعد ما تصفيها وافركي بيها فروة الرأس لمدة نصف ساعة..

كرري هذه العملية يوميا عند الذهاب إلى النوم لمدة شهر، بس خلي بالك إن المنقوع ده يكون طازج

يعني اليوم بيومه.

(((عرقسوس )))

من المعروف إن العرقسوس بيحتوي على مادة “الجليسريزين” والمادة دي معروفة بتقليلها للإفرازات الزيتية

من فروة الرأس وطبعا إنت عارفة إن المحافظة على نسبة الإفرازات الدهنية منخفضة تؤدي إلى السيطرة

على قشرة الرأس.

وطريقتها سهلة جدا كل اللي عليكِ إنك تاخدي شوية من مسحوق العرقسوس وتحطيها في حوالي مقدار لترمن خل التفاح في زجاجة مغطاة واستخدميه كغسول للشعر مرة واحدة في اليوم وهتشوفي النتيجة.

ودي كانت شوية نصايح للقضاء على القشرة،

بس لو النصايح دي ماجابتش نتيجة ياريت إنك تستشيري دكتور أمراض جلدية.
تانيا من اهم مشاكل الشعر

**تساقط الشعر **

ولأننا عارفين إن المشكلة دي بتهم كل بنت من بنات حواء وممكن إنها تسبب لها ضيق

خاصة وهي بتغسل شعرها أو بتسرحه وتلاقيه بيقع

وخاصة كمان لو كان بيقع بشكل كبير..

وعارفين إن ده بيكبر عندها شعور الخوف لأن طبعا مافيش بنت مابتحبش إن شعرها يكون كثيف وصحي..

-::تعريفات لابد منها ::-

في البداية فيه شوية تعريفات علمية عن الشعر لازم نكون على الأقل على علم بيها

لأنها بتساعدنا في علاج المشكلة..

(معدل تساقط الشعر)

يعتبر تساقط ما يتراوح بين 50 و100 شعرة في اليوم هو الحدود الطبيعية لتساقط الشعر،

وعند تساقط شعرة واحدة تحل محلها شعرة أخرى جديدة من نفس بويصلة الشعر الواقعة مباشرة تحت سطح الجلد.

لكن الخوف كله بيكمن في البصيلات الشعرية لأن البصيلات دي لا تتشكل خلال فترة حياة الإنسان.

ينمو شعر الرأس بمعدل سنتيمتر واحد أو نصف بوصة تقريبا في الشهر الواحد في طول كل شعرة

. ولكن مع مرور الوقت تتضاءل نسبة نمو الشعر

الجديد عند الإنسان وتتضاءل تدريجيا كمية الشعر في الرأس.

(بيتكون الشعر من إيه؟)

بيتكون الشعر بصفة أساسية من بروتين “الكرتين” والمادة دي هي نفس المادة الموجودة في أظافر اليدين والقدمين،

ومن الضروري وعلشان تحافظي على المادة إنك تتناولي كمية كافية من البروتين للمحافظة على نمو الشعر الطبيعي،

ويتوفر البروتين في اللحوم والدجاج والسمك والبيض واللبن الحليب والجبن وفول الصويا والحبوب والمكسرات..

(ليه شعرنا بيقع؟؟)

ده سؤال مهم قويأ سألتيه لنفسك خاصة لما تيجي تسرحي شعرك وتلاقيه بيقع كتير قوي،

وتقولي ليه؟ ده أنا مافيش حد بيهتم بشعره قدي، بس في الحقيقة إن فيه حاجات ممكن تكوني مش

واخدة بالك منها وهي دي اللي بتخلي شعرك يقع والحاجات دي هي…

شوفي بنفسك:

أولا: نقص الفيتامينات..

كتير مننا بيعتقد إن العناية بالشعر بتقتصر على الزيوت والكريمات اللي بنحطها عليه،

لكن في الحقيقة إن الشعر زيه زي باقي جسمنا محتاج للغذاء الصحي المفيد اللي متمثل في الفيتامينات والبروتينات..

وعلشان كده ياريت إنك تحرصي في غذائك على الغذاء الصحي المفيد اللي يكون بيحتوي على جميع العناصر الغذائية

زي اللحوم والدجاج والسمك والبيض واللبن الحليب والجبن وفول الصويا والحبوب والمكسرات.

ثانيا: حدوث اضطربات في هرمونات الجسم..

فيه حالات أو أوقات معينة بيحدث فيها خلل أو اضطربات في هرمونات الجسم،

مثلا يعني في أثناء “الدورة الشهرية” ممكن تلاقي إن شعرك بيقع في الفترة دي كتير وده بيكون سببه

هو نقص كمية الحديد.. وعلاجه إنك تتناولي أقراص غنية بفتيامنيات الحديد.

وأثناء الحمل بيحدث تساقط لشعر الرأس بشكل مش طبيعي خاصة بعد الشهر الرابع

وذلك لأن نسبة كبيرة من بصيلات الشعر تدخل في مرحلة الراحة أو الخمول وبالتالي تقل نسبة الشعر النامي

وسبب ذلك قد يكون فقر الدم أو التوترات العصبية أو بسبب زيادة إفرازات الغدة الدرقية.

ويسقط الشعر أيضا عند التعرض لضغط عصبي شديد قد يؤدي إلى حدوث اضطربات في هرمونات الجسم.

ثالثا: تناول بعض الأدوية..

مثل تناول حبوب منع الحمل لفترة طويلة بيؤدي إلى تساقط الشعر وذلك نتيجة لتأثير الهرمونات

اللي بتحتوي عليها هذه الحبوب، والنوع ده من التساقط بيكون تساقط مؤقت

إذ أنه يختفي وتعاود البصيلات نشاطها السابق وتعوض الشعر المتساقط وذلك بعد التوقف عن استعمال هذه الحبوب.

كمان الأدوية -والعياذ بالله- الخاصة بالسرطان بتؤدي إلى تساقط الشعر بشكل كبير وده لأن الأدوية

دي بتجعل الشعر هش وضعيف ويتساقط.

رابعا: اتباع ريجيم قاسي..

قد يكون السبب في تساقط الشعر هو اتباع نظام غذائي قاسي وذلك لأنه بيأثر على نشاط بصيلات الشعر،

علشان كده حاولي وإنتِ بتتبعي نظام الريجيم إنك ماتقسيش على نفسك قوي وحاولي إنك تتناولي الفاكهة

والخضروات والخضار والبروتينات الضرورية لبناء الجسم والمحافظة على حيويته.

خامسا: الإصابة ببعض الأمراض..

ممكن يكون الإصابة ببعض الأمراض -لا قدر الله- سببا من أسباب سقوط الشعر وطبعا هتسألي وتقولي الأمراض

دي زي إيه؟ زي مثلا: “أمراض الغدة الدرقية” وده نتيجة زيادة إفراز الغدة الدرقية

أو العكس بتكون نتيجة نقص إفراز الغدة الدرقية وده علاجه هو إنك تاخدي العلاج المناسب للغدة الدرقية.

سادسا: استخدام السشوار..

استخدام السشوار بصورة دائمة والتعرض للحرارة الزائدة بيؤدي لتقصف الشعر وفقدانه اللمعان

وبالتالي تعرضه للسقوط.

سابعا: لف الشعر..

لف الشعر كمان من الأسباب اللي بتؤدي إلى سقوط الشعر خاصة لو إنتِ بتستخدمي أنواع مصنوعة من المعدن،

كمان لف الشعر لفترات طويلة بيجهد البصيلات لأنك بتشدي شعرك قوي وبالتالي يؤدي إلى تساقط الشعر.

ثامنا: تسريح الشعر..

كمان ياريت إنك تبعدي عن شد الشعر بطريقة جامدة أثناء التسريح،

وكمان ياريت إنك تبعدي عن التسريحات المعقدة زي الضفيرة وذيل الحصان لأنها هي كمان بتساعد

على زيادة سقوط الشعر.

تاسعا: فرد أو تمويج الشعر..

كتير بيلجأ إلى عملية فرد الشعر أو تمويج الشعر من غير ما يعرف إن العملية دي لها تأثير ضار على الشعر..

لأنها بتؤدي إلى سقوط الشعر لفترات قد تكون طويلة وده لأن استخدام مواد كيمائية في عملية الفرد أو التمويج

بتحلل الروابط الموجود بين أجزاء الشعر فتصبح الشعرة ضعيفة جدا.

وعلى فكرة عملية فرد الشعر أو تمويجه لا يؤدي إلى تساقط الشعر فحسب بل قد يُؤذي فروة الرأس أيضا.

عاشرا: الصبغة..

كمان استخدام أنواع من صبغات الشعر المصنوعة من مواد كيمائية لأنها بتؤدي إلى فقدان لمعان الشعر

وتقصفه وبالتالي سقوطه…….

يتبع

17/5/2009

((((((((وصفات لعلاج تساقط الشعر))))))))))))

دي بقى مجموعة من الوصفات اللي بتساعد في علاج تساقط الشعر..

إنتِ اختاري اللي يعجبك

((وصفة الزعتر))

المكونات:

نبات الزعتر

ماء بارد

الطريقة:

يطحن نبات الزعتر لغاية ما يبقى ناعم جداً وبعد كده تاخدي منه ملء معلقة كبيرة

وحطيها في ملء كوب ماء بارد عادي، وغطيها وسيبيه لمدة يوم ثم صفي المية من التفل

واستخدمي المية دي في تدليك فروة الرأس بس بلطف،

كرري هذه العملية كل يوم قبل النوم لمدة شهر.

((وصفة عصير الفجل))

المكونات:

فجل

زيت خروع

الطريقة:

دي طبعا مافيش أسهل منها وهي عبارة عن إنك تفرمي الفجل في الخلاط

وبعد كده تاخدي العصير ده وتمزجي معاه كمية قليلة من زيت الخروع وادهني بيه فروة رأسك

واستمري في استعمال الوصفة دي كل يوم لمدة شهر.

والوصفة دي فايدتها إنها بتساعد على إنبات الشعر المتساقط.

((وصفة الزنجبيل وزيت السمسم ))

المكونات:

زنجبيل

زيت سمسم

عصير ليمون

الطريقة:

هاتي زنجبيل طازج وقشريه واعصريه وبعد كده خدي منه معلقة أو معلقتين واخلطيها مع ثلاث

ملاعق كبيرة من زيت السمسم مع نصف معلقة صغيرة من عصير الليمون وامزجيها مع بعض جيدا،

وبعد كده دلكي بيها فروة شعرك، كرري هذه العملية حوالي ثلاث مرات في الأسبوع لمدة شهرين.

((وصفة الزيت الثلاثي))

ودي عبارة عن مجموعة من الزيوت اللي معروفة باسم الزيت الثلاثي

المكونات:

زيت الخروع

زيت اللوز المر

زيت الزيتون

الطريقة:

امزجي مقدارا متساويا من زيت الخروع واللوز المر والزيتون مع بعض داخل زجاجة،

وبعد كده خدي شوية من مجموعة الزيوت دي ودلكي بيها فروة رأسك لمدة عشر دقائق قبل النوم،

وبعد كده سرحي شعرك بمشط ذي أسنان متسعة، وبعد كده غطي شعرك بإيشارب مصنوع من القطن لغاية الصبح،

وبعد كده لكِ الحرية إن إنت تغسلي شعرك بنوع شامبو مناسب إو إنك تسيبيه من غير غسيل.

والوصفة دي ميزتها إنها بتقوي الشعر من جذوره وتمنع تساقطه وكمان بتمنع ظهور القشرة،

ولو فيه قشرة بتشيلها، كرري هذه الوصفة لمدة شهر،

وبعد كده في الشهر التاني استمري في استخدام نفس الوصفة بس بدل كل يوم خليها يوم ويوم،

وبعد كده كرري العملية دي مرة كل شهر.

((وصفة إنما إيه))

الوصفة دي بقى إيه.. مافيش كده، وده لأن -زي ما إنتِ عارفة- السبب الأساسي في تساقط الشعر

هو نقص في المواد الغذائية وخاصة فيتامين (أ) فالوصفة دي مخصوص لكده،

وده لأن الجرجير والجزر والخيار بيحتووا على فيتامين (أ)..

مكوناتها:

خيار

جزر

جرجير

الطريقة:

والوصفة دي مش هتحتاج منك غير إنك تاكلي كل يوم خيارة وجزراية بقشرها لأن القشر ده هو اللي فيه الفيتامين،

ونصف حزمة جرجير.

وعلى فكرة الوصفة دي لو استخدمتيها مع وصفة الزيت الثلاثي هتجيب نتيجة إنما إيه.

يريت كلكو تتخلصو من كل مشاكل الشعر

عضو ماسى 17/5/2009 : 13/03/2010 العمر : 44

والله بجد برافو عليك جميل جدا الشرح والتفصيل وكمان العلاج الشافع النافع باذن الله للتخلص من قشرة الشعر
ايام زمان الشكر لمجهودك
محمد المنتصر
العاشق

» أنا و الشعر
» لكيرياتين وخطورته على الشعر
» ما هي اسباب الشعر الزائد عند المرأة؟

**قـــشر الشعر**

قـــشر الشعر