((راى فى موضوع التوك توك))
الموضوع ينقسم الى ثلاثة اجزاء
1--الجزء الاول-(النعمه اللى تتحسبله)
----------------
وهو ان التوك توك بلا شك مواصلة خفيفة وسهلة فى الانتقال بين الشوارع والحارات والازقة كمان وتوصلك ايضا لحد باب الدار -انت والاولاد والمدام -وتدخل الى الاماكن الضيقة اللى التاكسى او الميكروباس ما يقدرش يدخلها وممكن تلاقيه فى اى وقت وساعه
ولو كان عندك مريض او مريضة او-واحد مسن او سيدة كبيرة موش قادرة تخرج لحد الشارع العمومى علشان تركب مواصلة سريعه علشان تلحق الدكتور او سفر او زيارة موش هتلاقى الا التوك توك امامك-
وفى القرية كمان تلاقيه موجود فى الاماكن اللى مافيهاش مواصلات ويدخل بيك فى اى قريه او على راس الحقل كمان-وطبعا فى الريف بتوصل بيه للمدرسة -
وطبعا انه فتح باب للرزق كتير من سائقين الى ميكانيكيا الى كهربائية الى قطع غيار وخلافه كتير وكتير --
2-الجزء الثانى --(النقمه اللى عليه)
-------------------------------
ودى مصائب كتيرة جدا واعددها فالاتى-
1-باب الاستيراد مفتوح لكل الافراد فاستيراده مباح بدون ظبط ولا ربط -
2-عدم تقنينه فى ترخيصه وتسجيله ولو حتى فى الاحياء -علشان يكون له رقم ووحدة تابع لها -
3-صدور قانون للتسيير -فى اماكن معينة وموضحة والكل يلتزم بيها -
4-صدور ترخيص للا فراد العاملين عليه بحيث لا يقل السن عن 18 سنة(ودى علشان لما تقع حادثة منه اقدر احسبه -ويتقدم باوراق من ضمنها صحيفة الحالة الجنائية -
(اخيرا فى بعض المحافظات وبعض الاحياء فيها بداوا يرخصوه بمعرفة الاحياءفقط)
5-منع الصبيه الصغار من العمل عليه ومن يضبط تتصادر المركبة على طول من غير لف ولا دوران -
6-صدور تعربفة موحدة تحسب بالمسافة او بالفرد او كيفما يترءاى للمرور-
7-منع تشغيل السماعات مرتفعة الصوت والتى تسبب الطرش للراكب واللى فى الشارع كمان-
8-منع سير التوكتك فى الشوارع الرئيسية والمدن -
9- اعطاءمن يتقدم للحصول على رخصة قيادة محاضرات عن ان القيادة فن وذوق واخلاق وكيفية التعامل مع المواطنين-وكذلك كيفية التعامل مع باقى المركبات التى تسير معه فى الشارع-علشان دول لايعرفوا اى شىء عن الذوق ولا الاخلاق ولا فن القيادة ولا التعامل مع الغير -
بعد كله ده اظن ان الوضع يكون انظبط ويبقى التوكتك مركبة نافعة للافراد وللمواطن الغلبان -
3--الجزءالاخير-
-----------
فى الوضع الحالى والمعمول بيه مع شوية الصبية اللى بيعملوا عليه --وشوية المجرمين اللى من كل شكل ولون -مع البانجو ماشى مع السرقة ماشى مع ارتكاب الجرائم تلاقيه مع الاشتباك مع المواطن اللى هو بيستفيد منه ويتخانق معاه على كل صغيرة وكبيرة -مع الخطف والاغتصاب مشترك فيه -مع سبب ازمة المرور متواجد مع كل المصائب تجده وبسببه --ولا من ظابط يظبط ولا من رابط يربط ولا من قانون مرور يصدر للتقنيين والترخيص وتصحيح الاوضاع --ولا من توقيع مخالفات كانه مولود بلا اصل وفصل ودخيل على كل اصل وعلى المرور والاحياء -والسلام
