هذي طبوعي كل ما عسعس الليل
أصلّـح الدلـة وأجــــــر اللحونــــي
دلــةٍ موزونـة البـنّ والــهـــيـــــــل
والماء بوزن وحيّ هاك الوزونـــــي
منهـا تكيّفنـي ثلاثـة فناجـيـــــل
وأرتاح ويطير السهر في عيونـي
وأراجع الذكرى وأجـرّ المواويــل
والذكريـات بكـلّ شكـلٍ ولونـي
البعض منها يشرح الصدر بالحيل
والبعض لا والله يجـدد طعونـــــي
وأرجع وأفكّر في الليال المقابيـل
لعل وقتـي مـا يخيّـب ظنونـــــي
وأدخل على الله من حياة الغرابيل
حيث إن همّي ما تشيله متونـي
كنّك مفصّل فوقي الهـمّ تفصيـــــــل
لين إلتبسني مثل لبـس الجنونـي
حالي كما حال القلوب المشاغيـل
اللي من أطرف شـيء يتأثّرونـي
لو يشتكون الغبن والجور والميـل
للغيظ وسط صدورهـم يكتمونـي
فكّرت الا الموضوع يحتاج تحليـل
وفنّ الدراسة واحدٍ مـن فنونــي
عرفت وش عكّر مزاج المشاكيـل
يوم إنهم مـن وقتهـم يشتكونـي
أول سبب: نقالـة القـال والقيـــل
الطغمة اللـي جعلهـم يذهبونـي
قلوبهـم بالحقـد سـودٍ مغاليـــــــــل
ومن طبعهم بالمشكلـة يفرحونـي
وثاني سبب: ناسٍ على مثل ماقيل
لا يقطعـون الشّــــر و لا ينـفعــونـــي
والله ما يرفع ضغطك إلا المهابيـــل
العالم اللي في النحـر ينشبونـي
وثالث سبب: ناسٍ سوات المخاييل
على سلوم الطّيب ما يحرصونـــــي
خلّو سلوم أجدادهم رغو مع سيـل
وفي عالم التقليد جـو يركضونـــــي
طشّوا عمايمهم ولبسـوا بناطيـل
والموس فال أشنابهـم والدقونـي
وأرقابهم ما سلمت من السلاسيـل
تطبّعـوا بطبـوع هيـم البطونـــــــــي
في ذمتي ماعـاد باقـي رجاجيـل
إلا القليـل وجعلهـم يثبتـونـــــي
صفّة بعد صفّة وجيلٍ بعـد جيــــل
كلٍ من اللي قبله أنقص وأدونـي
هذي هي الأسباب من دون تفصيل
شرحت روس أقلام بس أعذرونــــي
واللي يبي تفصيل بالحيل بالحيـل
يقـدر يكلمنـي علـى تيلفونـــــــي
