وزاره البلطجيه
بعد ثوره 25 يناير الرائعه وبعد هزيمه الحزب الغير وطني وغير ديمقراطي في معركه الجمل الشهيره في ميدان التحرير والتي راح ضحيتها شباب مصر الشرفاء قرر بلطجيه مصر الاجتماع في منطقه شق التعبان وهي اشهر منطقه في مصر فيها المسجلون الخطر والسوابق والهاربين من الاحكام وهم حوالي عشره الاف نشأوا وترعرعوا في فقر ونهب المفجوع المخلوع حسني الغير مبارك وابنه اللي عكس جمال وعصابه علي بابا وزعيمهم عز واعوانه.
***************************
كان زعيم البلطجيه ابو دومه السمكري وهو اشهر بلطجي في مصر مافيش سجن مادخلوش ومافيش مكان في مصر الا وله فيه خناقه ومش اي خناقه اقل حاجه فيها قتل او بقليله ضربه سيف او قرن غزال وده مطواه معروفه طبعا غير حمايه صناديق الانتخاب من سنه 2000 والوقوف مع المرشحين وده كان موسم للجماعه البلطجيه وكان اقل حاجه تطلع لهم حوالي 5000 في الدوره الواحده .
جلس ابو دومه في صدر المجلس علي كرسي فرعوني اتسرق من المتحف في اثناء الثوره كان بتاع الملك مينا موحد القطرين وقال بصوت جهور يتناسب مع وجهه الملئ بالغرز من كثره عمليات الخياطه اخواني البلطجيه
طبعا الثوره السوده قضت علينا وعلي مستقبلنا في البلد وبصفتي الزعيم احب اقول لكم مش هنسلك لان مش هنعرف نحارب الجيش واللي كان بيحمينا من الوزرا ونواب المجلس واخوانا في الكار مشرفين في اللومان وخدو مكانا وعلشان كده انا جمعتكم علشان نشوف هنعمل ايه
كان مساعد ابو دومه الواد سفوريا واد صغير 18 سنه بس عتيد في الاجرام مولود علي رصيف وكل حياته بين اولاد الشوارع المشردين من حكم المخلوع مدرسه نشل وسرقه بالاكراه وخناقات وبلطجه.
رد وهو جالس جنب معلمه وقال لازم يامعلم تلاقي حل مش هنعرف ناكل عيش بالطريقه دي فرد المعلم والحل فقال سفوريا نشوف الواد حنكش هو اللي فينا متنور وساقط ابتدائيه وبيفهم في السياسه ولما كنا نعوز نتعامل مع بتوع المجلس هو اللي كان بيتفاهم معاهم فرد عليه الزعيم براوه عليك ياسفوريا ابعت اي حد من الصبيان بسرعه ينده عليه وهو اكيد متلقح علي قهوه عنتر وبعد ساعه جاء حنكش ومعاه حنتيره النصاب وده محترف نصب بين الخلق حتي انهم سموه الدكتور حنتيره يلبس البدله ويتناول مفاتيح دهب ويغرق شعره جيل ويطلع علي الاماكن الفخمه في المهندسين الزمالك ويقابل حد في الشارع يعمل نفسه يعرفه من زمان ويسلم عليه وبالاحضان ثم يساله محتاج اي خدمه معاك فلوس ويقول له الراجل الطيب بسلامه نيه لا شكرا معايا ويصمم حنتيره علي رؤيه الفلوس فلما يراها يأخذها في يديه علي سبيل الدعابه فلما يعيدها لصاحبها يكون قد اخذ نصفها بخفه يد سريعه واضعا المبلغ في جيبه وماان ان يلتفت حتي يودعه وقد اختفي في الزحام.
هذه خدعه من الاف خدع حنتيره الدكتورزي الشيكات بدون رصيد ووهنا ينادي المعلم هنبدأ القاعده يارجاله وطبعا كلكم عارفين وقف الحال اللي احنا فيه بعد الثوره وبعد ماكنا هايصين في الفساد شويه العيال بتوع الثوره قلبوا حالنا منهم لله ده حتي المزاج يقصد طبعا المخدرات بقي مافيش وعلشان كده هنشوف راي حنكش والدكتور في الشغله دي ايه
قال حنكش والله يامعلم ده شرف كبير نقعد معاك ومع الرجاله وطبعا حل المشكله دي عاوز حجرين مغمسين وشويه مزه علشان نمخمخ ونكب الفكره.
وفي ثواني كان كله جاهز وبعد شويه قال حنكش اسمع يامعلم احنا كام واحد فرد كتير قال حنكش والكتره تغلب الشجاعه صح فرد المعلم مش فاهم فقال حنكش يعني احنا لينا حقوق زي العيال بتوع الثوره وهنا قال حنتيره صح يامعلم احنا نقدم طلب لعصام شرف نطلب حقنا يعني نطلب مبلغ كبير نعمل بيه مشروع نكسب بيه بالحلال فرد حنكش صحيح كام مليون ولا حاجه شوف مبارك والعادلي وعز وغيرهم خدو كام وهنا قال الزعيم يعني هيدونا الفلوس دي بحجه ايه ده احنا بصمجيه ومعناش شهادات وهنا قال الدكتور يامعلم احنا قلق وخطر عليهم ولو منفذوش كلامنا نعمل لهم قلق انت ناسي بتوع الحزب الوطني المحلول اللي بيقولوا عليهم فلول عاوزنا نشتغل معاهم لحد انهاره وهنا انبسط كل البلطجيه وقالوا بصوت واحد اه احنا نولع في البلد ونقطع الطرق ونثبت كل البشر هو فيه كمان شرطه اصلا وهنا قال سفوريا اسمع يامعلم انا مره شوفت البرادعي في التلفزيون بيجمع توقيعات من الناس بس مش عارف ليه ايه رايك ك البلطجيه يبصموا علي طلباتهم ومعانا الواد خرطوشه اشتغل سنه صبي محامي يروح للاستاذ حسن الفهلوي المحامي يقدم التوقعات بتاعتا وهنا رد الدكتور صحيح يامعلم ده قانوني وحقنا فقال المعلم صحيح ياولاد العلم نور
استمر الاجتماع ساعات الي ان عليت سقف المطالب وبدل فلوس او مشروع لكل بلطجي او شقق اصبح وزاره نعم وزاره وحكومه مستقله عن الدوله حكومه دستورها وقانوها الزعيم وجلسه شيخ القبيله ..
قرر الزعيم كتابه الطلبات والنزول الي ميدان التحرير يوم الجمعه وقرر ان يضم في الثوره كل اولاد الشوارع والبلطجيه والسوابق ورد السجون والعاطلين والحراميه وحددوا مطالبهم
اولا انشاء وزاره للبلطجيه والحراميه واولاد الشوارع يكون وزيرها ابو دومه .
ثانيا توزيع شقه ووظيفه لكل شاب و معاش لكل فرد عجوز في الجمعيه
ومساعده الشباب في الزواج واطفال الشوارع في مكان نظيف يعيشون فيه .
ثالثا دستورهم قانون خاص بهم فلا محاكم ولا احكام الا من خلال الزعيم هو شيخ قبيلتهم وله الحكم بينهم
رابعا اعلان توبه كل الحراميه واولاد الشوارع واللصوص بعد تحقيق مطالبهم .
كان علي زعيم البلطجيه ان يختار يوم جمعه للتظاهر ولكن وجد ان كل الميادين كومبليت ومافيش جمعه فاضيه في التحرير فقرر التظاهر في ميدان مصطفي محمود او روكسي ولكن لم يكن الامر سهل فمشوار طويل بين شق التعبان وروكسي او جامع مصطفي محمود وقرر الزعيم ان تكون المظاهره في القلعه عند ميدان السيده وفرصه لو حصل اي هجوم يقوم البلطجيه بالاختباء في مقابر السيده عائشه .
وجائت جمعه البلطجه بقرب القلعه ورفع المتظاهرين لافتات بمطالبهم افراج وزاره بلطجه حريه عداله اجتماعيه ولافتات اخري تطالب بتعليم واخري تطالب بزعيمهم ابو دومه ملك للباطجيه ومن حسن حظ البلطجيه ان حشد الاعلام العربي والغربي كل كاميراته وصحفييه لتغطيه هذا الخبر القنبله وغطت قناه الجزيره الحدث لحظه بلحظه واجرت حوارات مع عدد كبير من البلطجيه الذين قالوا ان السبب فيما هم فيه المجتمع والناس وان الفقر والجوع يخلق طفل شوارع وبلطجي وطالبوا بشقه لكل اسره ومعاش يضمن لهم عدم العوده للبلطجه كما ان نهب المال العام في عصر المخلوع هو السبب الاول في ظهور حوالي عشره الاف بلطجي في مصر.
اما حنكوره وده بلطجي عجوز فسالته المذيعه بتاع قناه 360 درجه من تاييد للمخلوع الي المطالبه بمحاكمه الريس واسمها قناه النيل للحقيقه فسالته عن تاريخه في الاجرام ومطالبه فقال انا جدي كان بلطجي كبير ايام محمد علي اول بلطجي في مصر وسموه بلطجي علشان كان بياخد البلطه ويمشي بيها في الغابه يقلب عيشه وده ابو البلطجه يعني لا اسد ولا ديب ولا فيل بالصلاه علي النبي الكل بيخاف منه حتي محمد علي باشا .
وهو صاحب فكره مذبحه القلعه الشهيره وانا طلباتي عاوزه معاش وبناشد رئيس الوزرا والمجلس العسكري بمعاش لان سني كبر ومعدتش اعرف اتشاقي زي زمان وهنا ردت المذيعه الدلوعه وقالت وايه رايك في محاكمه الرئيس المخلوع فرد بسرعه بصي ياستي كل واحد بيغلط وكلنا ذنوب وعفي الله عما سلف يرجع القرشين ويادار مادخلك شر وانا مسامح.
وتستمر المظاهره حتي السادسه مساء ثم قرر الزعيم الاتجاه الي شارع القصر العيني للوقوف امام مجلس الوزراء ولكن الجيش والشرطه تحركوا بسرعه الي ميدان القلعه واوقفوا الزحف لشعورهم بالخطر من البلطجيه وعندما راي البلطجيه السيارات المدرعه والجيش اسرعوا بالفرار ودارت بعدهل مناوشات بين الطرفين انتهت بالقبض علي خمسين بلطجي هاربين من احكام وقرر الباقي تاجيل المطالب لبعد رمضان وكل عام وانتم بخير.
15 رمضان 1432
ناصر سيد
