الجنس الخشن .. و الناعم ،، بعد الجوااز ..!!

17/5/2009

طبعا كلنا عارفين ان فيه نوعين من الجواز .. جواز حب و مشاعر و احاسيس .. و جواز صالونـات و الجواز كدا كدا نصيب .. يا تطلع حمرا يا تطلع قرعه ( على نظرية سعيد صالح .. يا سيدي اهو كله برتقال )

طبعا جواز الحب دا بيبقي ميه ميه .. بتحب الموزه بتاعتك يا عم وربنا سهلك و اتجوزتها .. يا بختك ،، نسيب النوع دا شويه كدا و نمسك فى جواز الصالونات

طبعا انت لا هتكون عارف الى هتجوزها دي ولا عمرك شفتها .. ( احتمال ) بس نرجع و نقول الحب بيجي بعد الجواز .. !!

بص يا سيدي ... مش لازم ترتبط عن حب لأن الحب بيجي بعد الجواز .. بيجي بعد شهر فى عربيه حلوه كدا مرسيدس .. هيجي بعد ست شهور راكب اتوبيس نهري .. هيجي بعد سنه راكب عجله ( دراجه يعني ) .. متقلقش .. مهو كدا كدا جــاي

طل إفرض بقي جه و ملاقاش حد ..

و هل الحب يستحدث من عدم .. ولا عامل زي الطاقه لا يستحدث من عدم .. و اذا كان مش بيجي من فراغ .. يبقي مقولة الحب هيجي بعد الجواز اساسهـا ايه ؟؟ غير حب العشره طبعا ( مانت كدا كدا مش شايف غيرها قدامك ،، هتحب غيرها ازاي ) ..!!

نرجع بقي تاني لجواز الحـــب ..

بيقولو ان الحب الطبيعي نهايته الجواز .. !!

و اموت واعرف بيقولو ليه نهايته الجواز .. مهو مش معقول على رأي المرحوم علاء ولي الدين اما حبيبته سألته ايه اخرة مشينا سوا قالها ( أكيد هنقعد مش هنفضل ماشيين على طول ) و ليه الحب بيقل بعد الجواز ؟؟ يمكن بسبب الخناقات و المشاكل الى بتحصل ( مهو طبيعي اي بيت فيه خناقات و مشاكل ) ولا لأن كل واحد بيكون راسم للتاني صوره حلوه و بيتصدم يوم الصباحيه بالحقيقه المره ،، صحيح الحب ممكن شكله يتغير بعد الجواز .. ممكن يبقي تقليدي شويه مهوش سخن و موحوح زي الاول بس بيكون موجود .. ممكن اه الزوج مش يمسك ايد مراته و يسبلها و يقولها بحبك و يطلع هدية الفلانتاين من كم التي شيرت ( زي الساحر ) عشان يفرحها و يقولها كل سنه وانتي طيبه ..
بس لو الحب فعلا حقيقي و موجود مش هيختفي و هيفضل برده موجوده .. ولا ايه رأيكــم ؟؟

الزواج يلغي شخصية المتزوجين .. !!

دي حاجه انا سمعتها من واحد صحبي متجوز .. بيقول يا اما تلغي شخصيتها و تخليها مجرد تابع ليك .. يا اما تدبحلك القطه و تمشيك وراها .. طبعا انا سألته سؤال مهم جدا .. ليه قطه و مش فرخه !!
ما علينا .. انا طبعا استغربت من كلامه ... و قلت دا أكيد واحد متعقد من الجواز .. ممكن يكون الواحد بعد الجواز او البنت شخصيتها بتتحول .. مش نوع تحول زي الانسان الى بيتحول لذئب و يقف تحت القمر و يقول " أعـوووووووووووووووو " لأ طبعا الواحد بيتحول من شخص عايش مع نفسه لواحد متجوز و شايل مسئولية بيت و اسره .. و نفس الحال على البنت .. أكيد الشخصيه هتتغير تبعا لتغير الموقف بس الأكيد ان التغير مش هيكون جامد اوي او الى هو ممكن يخوف او يكره النص التاني فيك

لو دخل الفقر من الباب .. !!

دي مشكله و مهيش مشكله ..
يعني فيه كاتب بريطاني بيقول (الفقر ليس مشكله ، المشكله ان يعرف الناس انك فقير) ،، و احنا هنا فى مصر بنقول .. لو دخل الفقر من الباب .. خد الحب ديله فى سنانه و طار من السطوح .. و دي طبعا مش جمله أكيده او لازم تحصل .. لأن مش كل الستات عندهم ( عقدة البص ) او ( النفسنه ) و فيه ستات راضيه بالقليل و بتعيش زي الفل .. و فيه واحده تانيه تبص على بنت خالتها جوزها عامل معاها ايه .. و اختها عندها عربيه نوعها ايه .. و تعملك مشاكل تقرفك يا عم فى حياتك مع ان رزقك كدا و دي حاجه مش عيب ... دي حاجه من عند ربنا

الخناقات الزوجيه .. !!

مهي الحياه متعرفش تعيشها من غير ملح و بهارات
اهي الخناقات دي الملح و البهارات .. مهو بص يا معلمي .. لو متجوز عن حب .. مش متجوز عن حب .. كدا كدا غصب عنك هتعمل مشاكل مع مراتك .. يا راجل دا انت و هيا لو تؤام و اتجوزتو برده هيكون فيه مشاكل .. تختلفو فى رأي .. يحصل حاجه لا قدر الله تزعلكم سوا .. و اهو الزعل دا بقي البهارات بتاعة الجواز .. لو هيا زعلتك ممكن انت تصالحها بهديه حلوه .. بكلمه رقيقه .. ( ببوسه ان لزم الامر ) طبعا البنات هتبقي لاويه بوزها طول النهار لو جوزك من النوع الى بيصالح ببوسه .. !!
و فى نفس الوقت لو الزوجه هيا الى زعلت جوزها يبقي الله بقي اما تروح تدلع عليه و تحاول تصالحه .. واهو يبقي تجديد للحياه بينهم بس الخناق الى بنقول عليه هنا خناق حلو كدا و رقيق .. مش تمسكي لجوزك المطوه و تقوليله اوعي يغرك جسمك .. او هشرحك ياض لو لمستني !!
دي ساعتها متبقاش بهارات .. دي ساعتها تبقي ولعه هتولع فى البيت كله ،، وربنا ما يجيب حجات من دي طبعا .. و يارب يبقي الخناقات الى في حياتنا كلها من النوع الاولاني ..

خلاصة الكلام .. الحياه مشاركه ..

طبعا هيجي واحد و يقولى وانا مالي يا عم مانا اعيش لوحدي بلا وجع دماغ .. و واحده تقولى وانا مالي و مال الهم .. مانا فى بيت ابويا زي الفل

وساعتها هقولكم

والله ريحتو دماغكم وانا ناوي اعمل زيكم كدا ....

عضو ماسى 17/5/2009 : 13/03/2010 العمر : 44

استاذ عصام لقد اغرقتنا بموضوع غايه في الاهميه
وهنا السؤال
ما الفرق بين الحب والزواااااااااج؟

17/5/2009

ياأستاذ عصام المشكلة ليست بلزواج وانما المشكلة فينا نحن ايام الخطبة بيقولو ايام العسل فيه الكذب كتير فاكل واحد فينا بيطلع بابه صورة وبسوي حالو متفهم وفري وطرف الثاني فري اكتر منوصل على الجازة بنصدم بواقع غير الي بنعرفو فاالحل ان كل انسان يكون على طبيعته ويتقي الله في كل شي

17/5/2009

اشكرك اخى منتصر على توجدك المستمر

اما بخصو ص سوءلك ما الفرق بين الحب والزواج

خلينا وقعين الحب يكون فيه كل شيء مثالي وجميل
الزواج تظهر فيه الحقائق ، تظهر الأشياء كما هي سواء كانت جميلة أو قبيحة
الشخص عندما يحب قبل الزواج يظهر لمحبوبه الولاء والطاعة وتنفيذ مايرغب به
فيما بعد الزواج تكون هناك مسئوليات وتظهر التزامات واولويات

إذا تواجد الحب الحقيقي من الطرفين مع الزواج كان الوضع مستقراً
أما إذا لم يوجد فستختلف النظرة للزواج وبالتالي تظهر اسئلة
مثل هذا السؤال
الذي لاأراه منطقياً ــ وجهة نظر ــ أقصد ان السؤال ممكن يتم كالتالي :
ماهو الفرق بين الحب والكره أو بين الحب وعدم الحب ؟
ماهو الفرق بين الزواج والعزوبية ؟

تحياتى

عصااام

17/5/2009

تحياتى اخى مصطفى

على مرورك

عصااام