لأنى عامل نفسى فهيم ، أحيانا بيحلالى أطلع على البحر و أقعد قال يعنى بتأمل ، تقولش بوذا يا خى ـ المشترك بينى و بينه كرش ضخم ـ،المهم أنا قاعد قدام البحر بكرش بوذا و دماغى مافيهاش أى حاجه ، غير أنى كل ما اشوف بنت حلوه أتابعها بعينى من تحت لتحت أو أشوف واد و بت عايشين الغرام أقول يا رب يكون بجد ، ربنا يسعدهم ، وقف تاكسى وريا و لأن كان نازل منه صاروخ أرض جو ، حاجه كده ولا كاترين زيتا جونز ، و معاها حته واد قمر هو راخر شبه عمر الشريف ، لما تبص فى وشه تلاقى نفسك بتبتسم زى العبيط ولما تبص للبت تحس ان نفاسك رايح . لما البت اللى زى القمر بصتلى فى عينى بإستنكار ، وحالها بيقول ايه الرجل الكبيرالمدهول ده ماهى ناقصاه راخر . طبعا انا اتكسفت و رحت باصص قال ببص على التاكس والبصه جت فيها ، بصيت على التاكسى ويارتنى ما بصيت . لقيت مكتوب عليه " إزاى تطلب منى أمشى عدل و السكه عوجه " يا نهار الوان على دى جمله نسيت الست كاترينا و سى عمر و إتخطفت بجد . دى الجمله دى بتلخص موقف كامل من الحياه . الجمله بتقول يا بشر يا كدابه دنيتكم عوجه وانتم اللى عوجينها فما تطلبش من حد يبقى جدع او ابن اصول ازا كانت الدنيا كلها لا هى جادعه ولا بنت اصول . والجمله كمان بتقول أن السياق الحضارى اللى احنا عيشين فيه بايظ متنيل على عينه علشان كده لما حد من ولاد العرب لما بيروح بلاد الخوجات بيعمل حاجات ما حصلتش ، وبعدين نسأل نفسنا طب ما عملش كده ليه هنا . ببساطه لان السياق بتعنا معوج ما يصلحش غير لانه يطلع ناس عوجه بتكدب على نفسها و بتكدب على غيرها ، سألت نفسى طيب يعنى مفيش أمل ، لقيت أن المشوار طويل قوى علشان دنيتنا ما تبقاش عوجه ، انا مش بقول اننا نبقى كلنا صادقين او بنشتغل بجد او حتى ما بنكعبلش اللى بيشتغل بجد ونحسسه انه عبيط .بس يبقى فيه شويه مننا بس ممكن ينشلو بلادنا من الوكسه الحضاريه اللى عايشنها . وكسه مستمره بقالها حوالى الفين سنه تخيل أنت أن بلد زى مصر دى من أول عهد البطالمه لغايه دلوقت ما اتنصفتش ، ما جلهاش حد يحس بيها بجد و جواه دماغه مشروع مدروس عشان يرفعها من الطين . كل اللى يجى تلاقيه متنيل يا باصص على مجد شخصى يا على قرشين ، حتى الجدع ابو كرش اللى اسمه محمد على اللى يعتبر اكتر نموزج محترم من البطالمه لغايه دلوقت لما تقرب منه تلاقيه نصاب و مزور و ضحك على المصريين ،بس حب يوقف البلد دى على رجليها وده علشان كان عنده احساس انى بيبنى فى عزبه والدته و بيعمل لولاده من بعده ، لكن اهو عمل نهضه تعليم و حفر ترع و عمل جيش، بس الدول الكبرى ما عجبهاش الحال و فرملت طموحه . وساب لنا الاسره العلويه اللى كملت الانحدار وجه بعدها مغامر اهوج كمل علينا هو صاحبه اللى مسكه الجيش فوكسنا و نكسنا وجه بعده أرجوز أفاق كان لازم يشتغل نصاب و اللى بعده غبى جاهل حطنا فى قالب حديد فكمل تشويه شعب كامل كان فى يوم جميل كفايه انا حنكى مرر و حاسس انى حياتى راحت هدر فى بلد ضايعه منك لله يا سواق التاكس انت والست كاترين ما كنت قاعد مبسوط و اهبل و مفيش فى دماغى كلمه .
سان
