طبعا العنوان غريب .لكن بما اننا بشر . وما يميز البشر عن البقر هى الصفات الشريرة يعنى مثلا ما شوفناش بقرة بتحقد على بقرة تانية ههههههههه ولا بتقتلها ولا تخونها ولا حتى بتكذب عليها
انما البشر فحدث ولا حرج .
طيب المقدمة دى لازمتها ايه ؟ حقيقى مش عارف بس هى جات فى تفكيرى فقلت اكتبها
المهم نرجع لموضوعنا
وانا بحقد على مين وليه
بحقد على اصحاب الفخامات والسلاطين والرؤساء . وليه عشان ضربوا الرقم القياسى فى الجلوس على الكراسى . وما شاء الله وامسكوا الخشب الكراسى بتاعتهم ماجاش نحيتها السوس . هو فى كرسى فى الدنيا يشيل صاحبه 40 او 30 سنة .
المهم كنت عايز اخد فرصتى انا كمان . اشمعنى انا . وطبعا بعد اليأس من الوصول حتى لكرسى قدام بوابة قصر القبة . او حتى اى قصر فى مارينا او شرم الشيخ
قررت ان انا اروح امريكا ودى طبعا بلد الحريات . ويترفع الانسان هناك من حال الى حال فى طرفة عين .
وطبعا المصريين جبابرة . واحنا اللى طلعنا من النخل سمنة وسمناها " سمنة النخلتين والحب يرجع فى اكلتين "
يعنى لو الواحد لو راح امريكا كلها 4 سنين ويبقى مكان اوباما بشوية فهلوة وتزوير فى الانتخابات والكلام ده ميعرفهوش الامريكان لكن الحمد لله العبد لله شاف قدامه كل حركات التزوير فى الانتخابات بدءا من خروج الاموات واعطاء اصواتهم ثم الرجوع الى الجنة ونعيمها . لحد القاء الصناديق فى الترع والمصارف واحضار صناديق اخرى . وبصراحة كنت بتعجب من الموضوع ده
بس استنتجت ان الاموات كان بتعطى اصواتها ضد الحزن الوطنى !!!!
المهم وصلت امريكا ولاقيت الامريكان فعلا شعب طيب جدا . والحكاية كلها تعمل اى حركة وتلاقى وسائل الاعلام عملتك بطل قومى وهى دى الخطة اللى هتوصلنى للبيت الاصفر .
ففكرت اعمل ايه . قلت اجيب قطة واحطها فوق سور ناطحة سحاب وطبعا الدنيا هناك هتوقف مش بقلكم شعب امريكا طيب ؟!!! لو عندنا هنا الشعب كله وقف على سور ناطحة سحاب محدش هيعبره ومش بعيد يبعتوا حد يزقوا من فوق عشان يخلصوا منه .
المهم الخطة نجحت وانقذت القطة . وال cnn والدنيا بحالها وقفت وجه اوباما طبعا عشان يعطنى وسام ( ال عايز يعلم عليا ويرفع نسبة التأييد بتاعته بس على مين ) رفضت الوسام على ان ده واجب ولازم كل مواطن يتسم بروح التضحية من اجل اسعاد القطط ( ما انا لازم ارمى لقدام )
وجت الانتخابات الامريكية واتقدمت زى اى مواطن امريكى وليس عندى اى انجازات الا انقاذ القطة وطبعا لازم استغل موضوع القطة ده لاقصى حد وعملت مقابلات وشوية دموع وكلام عن المخاطرة والرعب اللى كانت قطة عايشة فيها على سور الناطحة وكيف كانت تشعر بالوحدة ومش مهم الرعب اللى انا عشته وان بعد انقاذها مازالت القطة تعانى من اعراض اضطراب نفسى وتحتاج الى عشرين سنة حتى تعود الى طبيعتها .
وطبعا لازم نلوم حكومة اوباما على الاهمال والتقصير لانها المفروض توقف شرطى فوق باب السطح عشان يمنع اى قطة تحاول الانتحار او يكون هناك وقت الخطر
وبكده حققت انجاز وضربت عصفورين بحجر واحد . وارتفعت الشعبية ونسبة التأييد لمستويات قياسية لم تحدث فى تاريخ امريكا عشية الانتخابات .
وحصل المراد ودخلت البيت الابيض . ( فينك يا بو شهاب تشوف حفيدك وهو قاعد فى الحجرة البيضاوية )
طبعا بقه انا فاكر هناك زى هنا خلصت بقه وصلت للكرسى مفيش نملة هتدخل الحمام الا اما تأخد الاذن منى (. الله مش رئيس هى حاجة سهلة كده ولا ايه ) .
لاقيت الدنيا مختلفة خالصصص . اللى ماشى ماشى لا بيستأذن واللى داخل برضه داخل من غير اذن .
حتى البيت الاصفر الاطفال بيعملوا رحالات وبيجيوا ولازم اسيب مهامى العظيمة فى حكم الشعب عشان اقوم اسلم على شوية عيال ( هزولت والله ) .
قلت فى نفسى البلد دى فوضى وعايزة واقفة . ده انا كنت موظف فى مصر على الدرجة الخامسة . الدنيا بتوقف ما تمشيش الا اما انا اقولها امشى . اجى هنا ابقى رئيس اكبر دولة ومش عارف اسيطر .
قلت اجرب كده معاهم واجس نبضهم ونبدأ بقضية فلسطين . وعملت اجتماع وجبت المستشارين بتوعى وياله عايزن نحل القضية دى يا رجالة . ولاد الذين... كل ما اجى اخد قرار يعترضوا ويقولك استراتيجيتنا القومية بتقول كده . وانا طبعا عشان مش عارف يعنى ايه استراتيجية فبضطر اسكت واعدى الموضوع .
وقعدت مع نفسى افكر وقارن نفسى كرئيس اكبر دولة فى العالم ورئيس اصغر دولة عندنا
لاقيت نفسى كتيرى 4 سنين فى امريكا وهارجع زى ما كنت . اما رئيس اصغر دولة عربية
فربنا يديله ويدلينا طولة العمر واخد حكم محكمة بالجلوس على الكرسى الى الابد والخروج بعد 3/4 المدة لحسن السير والسلوك . بس طبعا من ذكائهم بيشاغبوا عشان يقضوا المدة كاملة . عشان كده برضه بحقد عليهم حتى لو كنت رئيس امريكا
تخارييييييييييييييييييف مشروعة
واشوفكم فى الجنة ان شاء الله
