صباح الخير

صباح الخير على عينيكي
و ناسك أحلى ما فيكي
*****
على الناس اللي بالقسمة
رضت و تمللي مبتسمة
و روحها أخف م النسمة
و بايسة ايديها وش و ظهر
**
على الناس اللي طافحة الدم
و شايلة ألف هم و هم
و لكن مستحيل يا عم
تشوفها ساخطة يوم ع الدهر
*****
صباح الخير على عينيكي
و ناسك أحلى ما فيكي
*****
على الناس اللي حابسة دموع
عينيها ف قلبها الموجوع
و فاردة من ايمانها قلوع
و عاملة صبرها مقاديف
**
على الناس اللي مافيها
من الدنيا مكفيها
و أي مرارة تخفيها
بنكتة زي حد السيف
*****
صباح الخير على عينيكي
و ناسك أحلى ما فيكي
*****
على الناس اللي لجل القوت
يوماتي ألف مرة تموت
و قطرك يا وطن بيفوت
عليها و عمره ما لمحها
**
على الناس اللي رغم الويل
و مهما طال عليها الليل
بتعشق لسه أرض النيل
بروحها و كل جوارحها