عصام اسكندر
مشرف منتديات ايام زمان العامه
 17/5/2009 : 06/04/2010
العمر : 54
 | موضوع: مفيش ذمة وضمير واخلاق  الثلاثاء مايو 11 2010, 22:59 | |
| مفيش ذمة وضمير واخلاق
لما تكون بقالك سنة شهور شغال وبتحوش في مرتبك
علشان تجيب لك موبايل بكاميرا وبيشغل اغاني وحوشت الفلوس وروحت اشتريت
وتركب تاكسي وموبايلك يوقع في التاكسي وانت تتصل برقمك
تلاقي الموبايل اتقفل والشريحة اترمت وخلاص مفيش موبايل
(يبقي مالهاش غير معني واحد مفيش ذمة وضمير واخلاق )
----------------
لما تروح محافظة غير محافظتك بتخلص اي مصلحة
وانت علشان مش عارف المواصلات ايه ظروفها هناك
فبتركب تاكسي وخلاص علشان يوديك المكان اللي انت عايزه
وعلشان انت غريب عن البلد ومتعرفش الاسعار ايه
يقوم السواق ضاحك عليك في الاجرة
يبقي مفيش ذمة وضمير واخلاق
----------------
لما تروح السوبر ماركت علشان تشتري اي حاجة ليك او للبيت
وترجع البيت وتبص في الحاجة اللي انت اشتريتها تلاقي مدة الصلاحية منتهية
والبياع بايع ليك الحاجة دي وعارف
يبقي مفيش ذمة وضمير واخلاق
----------------
لما تروح تاني السوبر ماركت وانت بتحاسب البياع
فالبياع يغلط في الحساب وانت صاحي ومركز وعارف ان هو كده ليه باقي
وتاخذ بعضك وتمشي وكان شيئا لم يكن
يبقي مفيش ذمة وضمير واخلاق
----------------
لما وانت راكب وفي الترام بتاع اسكندرية
وتلاقي واحد ركب جمبك
والراجل الكمثري بيقول حد عاوز يخلص ضميره حد بيراجع ضميره
وهو مش في دماغه مع العلم ان تذكرة الترام ب25 قرش يعني ربع جنيه
يبقي مفيش ذمة وضمير واخلاق
----------------
لما انت تروح اي مصلحة حكومية علي الساعة 8 الصبح
وتسال علي الموظف اللي معني بتخليص الورق اللي انت محتاجه
يقولك هو اجه بس مضي ومشي
يبقي مفيش ذمة وضمير واخلاق
----------------
لما تكون انت واحد متجوز وقاعدة في شقة والدتك او والدك
وفي مشاكل اه بين امك وبين مراتك
فانت روحت تقدم علي شقة
والباحث جالك
فانت علشان الباحث يديك الشقة اللي انت اصلا ما تستحقهاش
تزبطه وتقبضه علشان يكتب حاجة غير اللي شافها لان انت كلكم علي بعضكم تلاتة
ويروح لناس تانية ممكن يكونوا سبعة في الشقة بس علشان ما قبضوش
يبقي انهم ما يستحقوش الشقة دي
يبقي مفيش ذمة وضمير واخلاق
----------------
لما انت تروح علشان ترخص العربية علشان تجدد رخصة العربية
فالمهندس بتاع الفحص علشان ما يقعدش يتلكك لك علي حاجة
وهي اصلا العربية زي الفل مفيهاش حاجة
بس علشان يمشيلك ورقك
لازم تجيبله كارت شحن يا ب50 يا ب100
يبقي مفيش ذمة وضمير واخلاق
----------------
لما انت تكون فاتح محل النت
وحملة مصنفات تجيلك وانت مرخص وكل حاجة تمام وزي الفل
بس برده علشان هما اتللكوا ليك فقاموا مدينك قضية ب20 الف جنيه
علشان انت بس مكنتش مزبط مع المخبرين علشان يقولوا ليك قبل ما الحملة تطلع
علشان تقفل المحل وقت الحملة وتريح دماغك منهم
يبقي مفيش ذمة وضمير واخلاق
----------------
لما تكون شغال سواق تاكسي وماشي في حالك
وعسكري المرور يقولك هاتلي فطار علشان ما اديكش مخالفة
او استقصد العربية دي واديها مخالفات من غير ما تكون كاسر اشارة او اي حاجة تانية من بتاعة المرور
يبقي مفيش ذمة وضمير واخلاق
----------------
طبعا مش كل الناس معندهاش ذمة وضمير واخلاق بس دي الاغلبية والحياة عندنا خلاص بقت ماشية كده
لو كل اللي انا قولته فوق ده اتغير اعرفوا ساعتها ان بقي في ذمة وضمير واخلاق | |
|
موجة مصرية
ادمن المنتدى
 17/5/2009 : 03/04/2010
العمر : 59
| | موضوع: رد: مفيش ذمة وضمير واخلاق الأربعاء مايو 12 2010, 00:39 | |
| يبقي مفيش ذمة وضمير واخلاق
ياااه يا استاذ عصام
كل ده بيحصل فعلا
كل ده من واقع الحياة الحياتية الى بنعيشها
وممكن تحصل لأى احد فينا
لله الامر من قبل ومن بعد
أتمنى ان يعم الضمير على البشر ويكون سكنى فى قلوبهم
خالص تحياتى العطرة
موج | |
|
عصام اسكندر
مشرف منتديات ايام زمان العامه
17/5/2009 : 06/04/2010
العمر : 54
| | موضوع: رد: مفيش ذمة وضمير واخلاق الأربعاء مايو 12 2010, 06:46 | |
| اتمنى ذلك اخت موجة
تحياتى لحضرتك على مرورك
عصااام | |
|
