google_protectAndRun("ads_core.google_render_ad", google_handleError, google_render_ad);
قتلوني يامه وفجروا راسي
سحلوني في الشارع وطفوا أنفاسي
كان كل ذنبي إني سألت ازاي
من غير سبب بتفتشوا لباسي
والباشا قاعد في البوكس عالكرسي
والكلب إيده اتمدت لإخراسي
لما لقوني خلاص مش راضي بالذله
وبأعلى صوتي بأقول لأه وميت لأه
اتجمعوا كلهم يشتركوا في العلقه
شلوت وبوكس على جسمي على راسي
والباشا متمزك مجعوص وبيدخن
بينادي في كلابه جروه هنا أحسن
سحلوني زي الفار لأ ده أنا ألعن
ببياده وش حديد بيكسروا راسي
الدم سال عالحيط وطرطش الحته
بعنيه شايف البيت والجيره والحته
بصرخ بعلو الصوت خلاص بقيت جته
مش همه دول أهلي مش همه دول ناسي
كله تمام يابيه خلصنا عالمذكور
سيبينوه هنا ليه ماتلقحوه عالسور
الكلب ابن الإيه عامل زعيم بيثور
ارموه وتفوا عليه حمار وكان ناسي
تركوني يامه خلاص والروح لباريها
وصيتي للناس لاتقولوا لأ فيها
أنا اسمي خالد سعيد
مغدور ومات فيها
مصر ماليها مناص
حاميهاحراميها
فضاها من ناسي
فضاها من ناسي
محمد البنا 12/6/2010
