.راجع كل تاريخ البشرية
من أول آدم
واتفرج ع العالم
من قهر وعبودية
وظلم
الإنسان للإنسان..
واسرح بخيالك.. واشطح.. وارجع
احمد ربك..
واستغفر من
قلبك..
وقولها ف سرك
اللهم اخزيك يا شيطان..
وتخيل.. مثلا.. مثلا
لو
دوران الأرض ده
كان بأوامر م السلطان..
لو إن الموج والريح والدم
دول بيد الدخلية
لو لبن
الأم..
كان بجواب توصية
أو بقرار..
لو إن
ميلادك..
أجلك..
رزقك..
سمعك..
بصرك..
كان يستوجب
إذن وزارة
السكان..
مثلا.. مثلا
لو مفاتيح الجنة والنار
كانت عهدة عند أمين مخزن
فاسد
ليل ونهار سكران..
مثلا.. مثلا
لو إن الرحمة والغفران
بأمر وزارة
المالية
أو إن الدورة الدموية
كانت من إنتاج مصنع
عضو بارز فى
البرلمان
لو إن قلوبنا بيتحكم فيها
مخ مضلم خربان..
تخيل..
كان شكل
العالم يبقى إزاى
واحمد ربك..
